မိုင်းရှူးမြို့နယ်တွင် SSPP/SSA အဖွဲ့မှ ဒေသခံတိုင်းရင်းသားများအား လူသစ်နှင့် ဆက်ကြေးငွေများ အတင်းအကြပ်ကောက်ခံ

၂၀၁၅ ဒီဇင်ဘာ ၃၀

ရှမ်းပြည်နယ်တောင်ပိုင်း၊ မိုင်းရှူးမြို့နယ်၊ ၀မ်လွိုင်ကျေးရွာအုပ်စု၊ ၀မ်လွိုင်ကျေးရွာသို့ ဒီဇင်ဘာလ ၂၈ ရက် နေ့တွင် SSPP/SSA အဖွဲ့တစ်ဖွဲ့မှ ရောက်ရှိလာပြီး ဒေသခံတိုင်းရင်းသားများအား လူသစ်နှင့် ဆက်ကြေးငွေများ အတင်းအကြပ်ကောက်ခံသွားခဲ့ကြောင်း ယင်းဒေသခံများထံမှ သိရှိရပါသည်။
 
“ သူတို့အဖွဲ့က ရွာကိုခဏခဏလာပြီး ဟိုဟာတောင်းလိုက် ဒီဟာတောင်းလိုက်နဲ့ အခုလည်း လူသစ် ၃ယောက် ပေးရမယ်လို့ပြောတယ်၊ ရွာသားတွေကလည်း ပေးရတာများတော့ ဘယ်လိုလုပ်ပေးရ မှန်းမသိ ဖြစ်နေကြတယ်၊ မပေးပြန်ရင်လည်း ဒဏ်ငွေဆောင်ခိုင်းတယ်၊ ဒဏ်ငွေကလည်း လူသစ် ၁ ယောက်ကို ၅ သိန်းနှုန်း သူတို့က သတ်မှတ်ထားတယ်” ဟု ရပ်မိရပ်ဖတစ်ဦးမှ ပြောပါသည်။

SSPP/SSA အဖွဲ့သည် လူသစ်နှင့် ဆက်ကြေးငွေကောက်ခံခြင်းများအား မိုင်းရှူးမြို့နယ်၊ ၀မ်လွိုင်ကျေးရွာ အုပ်စု၊ မော်မေ့ကျေးရွာအုပ်စု၊ ၀မ်ဆော့ကျေးရွာအုပ်စု၊ ကျေးသီးမြို့နယ်နှင့် မိုင်းနောင်မြို့နယ်များတွင် အတင်း အကြပ် လိုက်လံကောက်ခံနေကြောင်း ၀မ်လွိုင်ကျေးရွာသားတစ်ဦးမှ ပြောပါသည်။

SSPP/SSA အဖွဲ့အနေဖြင့် ဒေသခံတိုင်းရင်းသားများထံမှ လူသစ်၊ ဆက်ကြေးငွေနှင့် ရိက္ခာတောင်းခံခြင်း များသည် အစိုးရတပ်များနှင့် တိုက်ပွဲဖြစ်ပြီးနောက်ပိုင်း ထိခိုက်ဒဏ်ရာရရှိမှုများသဖြင့် အတင်း အကြပ်ကောက် ခံနေမှုကြောင့် ဒေသခံများ နေရပ်စွန့်ခွာထွက်ပြေးတိမ်းရှောင်နေကြပြီး တောင်ယာ စိုက်ပျိုးရေးလုပ်ငန်းများတွင် အခက်အခဲဖြစ်နေကြောင်းနှင့် မိသားစုစားဝတ်နေရေးအတွက် အဆင်မပြေဖြစ်နေကြောင်း မိုင်းရှူးမြို့ခံ တစ်ဦးမှ ပြောပါသည်။ အဆိုပါ SSPP/SSA အဖွဲ့သည် အစိုးရမှ တိုင်းရင်းသားလက်နက်ကိုင်အဖွဲ့အစည်းများ NCAတွင် လက်မှတ်ရေးထိုးရန် အကြောင်းကြားထားသော်လည်း အဆင်သင့်မဖြစ်သေးဟု အကြောင်းပြန် ထားသော အဖွဲ့အစည်းတစ်ခုဖြစ်ပါသည်။ 
ခွန်စစ်အောင်

Credit >>> Shan News