လဲချားမြို့နယ်တွင် RCSS/SSA အဖွဲ့မှ ဒေသခံရွာသား ၅၀ ဦးအား လူသစ်အဖြစ် အတင်းအကြပ် ဖမ်းဆီးခေါ်ဆောင်

၂၀၁၅ သြဂုတ် ၃၁

ရှမ်းပြည်နယ်တောင်ပိုင်း၊ လဲချားမြို့နယ်အတွင်းရှိ ကျေးရွာအုပ်စုများတွင် သြဂုတ်လ(တတိယ)ပတ်မှ စ၍ ဒေသခံရွာသား ၅၀ ဦးအား RCSS/SSA အဖွဲ့တစ်ဖွဲ့မှ လူသစ်အဖြစ် အတင်းအကြပ် ဖမ်းဆီး ခေါ်ဆောင်သွားခဲ့ကြောင်း ယင်းဒေသခံများထံမှ သိရှိရပါသည်။

“ ကျေးရွာအုပ်စုတစ်စုကို ၁၅ ယောက်လောက်ပါသွားတယ်၊ သူတို့ပြောတာကတော့ မူးယစ်ဆေးသုံးမသုံး စစ်ဆေးဖို့လို့ပြောတာပဲ၊ အဲဒီလိုသာ အကြောင်းအမျိုးမျိုးပြပြီးခေါ်နေရင် ရွာတွေမှာရွာသားတွေ ဆက်ပြီးနေဖို့ အခက်အခဲဖြစ်နေကြတယ်၊ လူငယ်တွေလည်း သူတို့ရန်ကိုကြောက်လို့ ထိုင်းဘက်ကိုသွားပြီး အလုပ်လုပ်နေကြတယ်၊ တချို့လည်းအခြားမြို့တွေကို ထွက်ပြီးအလုပ်သွား လုပ်နေတဲ့လူတွေရှိတယ်“ ဟု ရပ်မိရပ်ဖတစ်ဦးမှ ပြောပါသည်။

RCSS/SSA အဖွဲ့မှ ဖမ်းဆီးခေါ်ဆောင်သွားသော ဒေသခံရွာသား ၅၀ ဦးမှာ လဲချားမြို့နယ်၊ တက်မောက် ကျေးရွာအုပ်စု၊ ၀မ်ထီကျေးရွာအုပ်စု၊ ၀မ်လေကျေးရွာအုပ်စုနှင့် ခွန်ဟုန်းကျေးရွာအုပ်စု များမှဖြစ်ကြောင်း သိရှိရပါသည်။ အဆိုပါ ဖမ်းဆီးခံရွာသား ၅၀ ဦးအား ယင်းအဖွဲ့နေထိုင်သော လဲချားမြို့နယ်၊ ဟဲဆိုင်ကျေးရွာ အုပ်စု၊ ၀မ်လုတ်ကျေးရွာအနီးတွင် ဖမ်းဆီးခေါ်ဆောင်ထားကြောင်းနှင့် အခြားကျေးရွာများတွင်လည်း လူသစ် ထပ်မံစုဆောင်းလျက်ရှိကြောင်း သိရှိရပါသည်။

RCSS/SSA အဖွဲ့အနေဖြင့် ဒေသခံရွာသားများအား လူသစ်စုခြင်း၊ ဆက်ကြေးတောင်းခံခြင်းနှင့် ရိက္ခာ ကောက်ခံခြင်းများကြောင့် အစိုးရနှင့် ၎င်းတို့ခေါင်းဆောင်ပိုင်းများ၏ ငြိမ်းချမ်းရေးဆွေးနွေးမှု အပေါ် ဒေသခံ များမှ ယုံကြည်မှု ကင်းမဲ့နေကြကြောင်းနှင့် ယင်းအဖွဲ့၏ ယခုလိုကိစ္စများကြောင့် မကျေမနပ်ဖြစ်နေကြကြောင်း လဲချားမြို့ခံ တစ်ဦးမှ ဆက်လက်ပြောကြားသွားပါသည်။

စိုင်းအောင်ခမ်း

Credit >>> Shan News