RCSS/SSA အဖွဲ့၏ လူသစ်စု၊ ဘိန်းဆက်ကြေးကောက်ခံမှု လောင်းရိပ်အောက်မှ ဒေသခံရွာသားများ ရုန်းမထွက်နိုင်သေး

၂၀၁၅ သြဂုတ်လ ၂၁

ရှမ်းပြည်နယ်တောင်ပိုင်း၊ မိုင်းနောင်မြို့နယ်ခွဲ၊ ၀မ်ဆင်းကျေးရွာအုပ်စု၊ ၀မ်ဆင်းကျေးရွာသို့ သြဂုတ်လ ၁၆ ရက်နေ့တွင် RCSS/SSA အဖွဲ့ တစ်ဖွဲ့ ရောက်ရှိလာပြီး ဒေသခံလူငယ် ၅ ဦးအား မူးယစ်ဆေးဝါး သုံးစွဲသည်ဟု အကြောင်းပြကာ လူသစ်အဖြစ်ဖမ်းဆီးခေါ်ဆောင် သွားခဲ့ကြောင်း ယင်းဒေသခံများထံမှ သိရှိရသည်။

“ ဒီရွာက လူငယ်တွေက မူးယစ်ဆေးဝါးသုံးစွဲဖို့နေနေသာသာ သူတို့လူသစ်စုလွန်းလို့ ရွာကနေ အခြားနေရာတွေကို ထွက်ပြေးနေကြရတာ၊ မူးယစ်ဆေးဝါးကို ရွာသားတွေက မသုံးစွဲနိုင်ဘူးလေ၊ သူတို့တွေကသာ သုံးစွဲနေကြတာ၊ ပြောင်းပြန်ဖြစ်နေပြီ၊ ဒါကတော့ တမင်အကြောင်းပြပြီး လူသစ် အတင်းလာစုသွားတယ်လို့ပဲ ပြောရမှာပဲ” ဟု ဒေသခံရွာသားတစ်ဦးမှ ပြောပါသည်။

RCSS/SSA အဖွဲ့သည် မိုင်းနောင်မြို့နယ်၊ ၀မ်ဆင်းကျေးရွာ အနီးတစ်ဝိုက်တွင် ခိုအောင်းနေထိုင်လျက်ရှိပြီး ၀မ်ဆင်းကျေးရွာအပြင် ၀မ်ကျောင်းကျေးရွာ၊ နောင်တောက်ကျေးရွာ၊ ဟိုဟူကျေးရွာနှင့် ကျောင်းတစ်ကျေးရွာ များရှိ အသက် ၁၈ ပြည့်ပြီး လူလတ်ပိုင်းများအားလည်း စာရင်းကောက်ယူ၍ အတင်းအကြပ် လူသစ် စုဆောင်း လျက်ရှိကြောင်း သိရှိရပါသည်။

RCSS/SSA အဖွဲ့အနေဖြင့် မူးယစ်ဆေးဝါးသုံးစွဲသည်ဟု အကြောင်းပြကာ အတင်းအကြပ်လူသစ်စုဆောင်း မှုများကြောင့် ဒေသခံတိုင်ရင်းသားများ အနေဖြင့် နေရပ်စွန့်ခွာထွက်ပြေးတိမ်းရှောင်နေရသဖြင့် စိုက်ပျိုးရေး လုပ်ငန်းများတွင် လုပ်ကိုင်ဆောင်ရွက်နိုင်ခြင်းမရှိသောကြောင့် မိသားစုစားဝတ်နေရေးအတွက် အခက်အခဲနှင့် ရင်ဆိုင်ကြုံတွေ့ရကြောင်း ၀မ်ဆင်းကျေးရွာသားတစ်ဦးမှ ဆက်လက်ပြောကြားသွားပါသည်။

‪
 စိုင်းခွန်စစ်
 
Credit >>> Shan News