SSPP/SSA အဖွဲ့မှ ဒေသခံကျေးရွာများအား လူသစ်နှင့်ဆက်ကြေးငွေများ အတင်းအကြပ်ကောက်ခံလျက်ရှိ

၂၀၁၅ စက်တင်ဘာ ၁၆ 

ရှမ်းပြည်နယ်တောင်ပိုင်း၊ မိုင်ရှူးမြို့နယ်၊ ၀မ်လွိုင်ကျေးရွာအုပ်စုအတွင်းရှိ ကျေးရွာ ၄ ရွာသို့ SSPP/SSA အဖွဲ့တစ်ဖွဲ့ ရောက်ရှိလာပြီး လူသစ်နှင့် ဆက်ကြေးငွေများ အတင်းအဓမ္မ ကောက်ခံ သွားကြောင်း ဒေသခံ ရွာသားများထံမှ သိရပါ သည်။

“ SSPP/SSA အဖွဲ့က ကျွန်တော်တို့ရွာကို မနက် ၆ နာရီမှာ ရောက်လာတယ်၊ ရွာမှာရှိတဲ့ ကျေးရွာ အုပ်ချုပ်ရေးမှူးကို ခေါ်ပြီး၊ ကျွန်တော်တို့ ၀မ်လွိုင်ကျေးရွာ အပါအ၀င် ဝေဟေ့ကျေးရွာ၊ နားလင်းကျေးရွာနဲ့ နမ်လောကျေးရွာက အုပ်ချုပ်ရေးမှူးတွေကို ခေါ်ခိုင်းတယ်၊ အခြားရွာက ကျေးရွာ အုပ်ချုပ်ရေးမှူးတွေ ရောက် လာတော့ ကျွန်တော်တို့ရွာ ဘုန်ကြီးကျောင်းဓမ္မာရုံမှာ အစည်းအဝေးလုပ်တယ်၊ လူသစ်နဲ့ ဆက်ကြေးပေးရ မယ် ဆိုပြီးပြောတယ်၊ ညနေ ၆ နာရီမှာ သူတို့အဖွဲ့ တွေ ပြန်သွားတယ်” ဟု ၀မ်လွိုင်ကျေးရွာသား တစ်ဦးမှ ပြောပါသည်။

 
“ လူသစ်နဲ့ဆက်ကြေး တောင်းခံရတဲ့ရွာတွေက လားဟူလူမျိုးနဲ့ ပလောင်လူမျိုးအများဆုံးနေထိုင် တဲ့ ကျေးရွာတွေပါ၊ မင်းတို့လားဟူနဲ့ ပလောင်လူမျိုးတွေ ဒီရှမ်းပြည်နယ်မှာနေရင် မင်းတို့လည်း ဒီအဖွဲ့ထဲ ၀င်ရမှာပဲ၊ မင်းတို့ မ၀င်ချင်ရင် ဒီရှမ်းပြည်နယ်မှာ မနေနဲ့လို့ပြောတယ်၊ စက်တင်ဘာလထဲ နောက်ဆုံး ထားပြီး ကျေးရွာတစ်ရွာကို လူသစ် ၁၀ ဦးနှင့် ဆက်ကြေးငွေ ၅ သိန်းစီပေးရမယ်လို့ ပြောသွားတယ် ” ဟု အမည်မဖော်လိုသူရွာသား တစ်ဦးမှ ပြောသွားပါသည်။

 
SSPP/SSA အဖွဲ့သည် ပါးစပ်ကသာ ရှမ်းပြည်နယ်ကြီး ဖွံ့ဖြိုးတိုးတက်အောင် လုပ်နေသည်ဟု ပြောပေမယ့် လူသစ်စု၊ ဆက်ကြေးကောက်မှုတွေကြောင့် ဒေသခံများ စားဝတ်နေရေး ကျပ်တည်းပြီး လူနေမှု ဘ၀နိမ့်ကျနေရကြောင်း မိုင်းရှူးမြို့ခံတစ်ဦးမှ ပြောပြပါသည်။
စိုင်းသီဟ

Credit >>> Shan News