RCSS/SSA အဖွဲ့မှ ကွန်ဟိန်းမြို့နယ်အတွင်း လူသစ်နှင့် ဆက်ကြေးများ အတင်းအကြပ်ကောက်ခံ

၂၀၁၅ စက်တင်ဘာ ၁၆  

ရှမ်းပြည်နယ်တောင်ပိုင်း၊ ကွန်ဟိန်းမြို့နယ်၊ လိုက်ကမ်ကျေးရွာအုပ်စု၊ ဟိုကျယ်ကျေးရွာသို့ RCSS/SSA အဖွဲ့တစ်ဖွဲ့သည် စက်တင်ဘာ ၁၂ ရက်နေ့တွင် ရောက်ရှိလာပြီး လူသစ်နှင့် ဆက်ကြေးငွေများ အတင်းအကြပ် ကောက်ခံနေကြောင်း ယင်းဒေသခံရွာသားများထံမှ သိရပါသည်။

“ ကျွန်တော်တို့ရွာကို စက်တင်ဘာ ၁၂ ရက်နေ့ မနက် ၈ နာရီလောက်မှာ RCSS/SSA အဖွဲ့ရောက်လာ တယ်၊ ကျေးရွာအုပ်ချုပ်ရေးမှူးကိုခေါ်ပြီး လူသစ် ၅ ယောက်နဲ့ ဆက်ကြေးငွေ တစ်အိမ်ထောင်ကို ၁၀၀၀၀ တောင်းတယ်၊ ကျွန်တော်တို့ရွာတွေမှာ တောင်ယာအလုပ်ပဲ ရှိတယ်၊ အခြားဘာဝင်ငွေမှမရှိဘူး၊ မပေးချင်ပေမဲ့ ကြောက်တော့ ပေးလိုက်ရတယ်” ဟု ဒေသခံရွာသားတစ်ဦးမှ ပြောပါသည်။

“ကျွန်တော်တို့ရွာက ကျေးရွာအုပ်ချုပ်ရေးမှူးကိုလည်း သူတို့အဖွဲ့တွေက ဆင့်ခေါ်တယ်၊ ရွာမှာက ရွာလုံးကျွတ် အလှူပွဲကျင်ပနေတော့ အားလုံးက အလုပ်များနေကြတယ်၊ ရွာအလှူပွဲပျက်မှာကြောက်တော့ သွားရတာပဲ၊ အလှူပွဲ ကျင်းပနေလို့လားတော့မသိဘူး၊ ဘာမှတော့ မတောင်းဘူး၊ ရွာသူ/ရွာသားအားလုံးက ရွာကအလှူပွဲပျက်မှာကို အရမ်း စိုးရိမ်နေကြတယ်၊ ကျေးရွာအုပ်ချုပ်ရေးမှူး ပြန်လာမှပဲ အားလုံး စိတ်အေးရ တယ်” ဟု ၀မ်မိုင်ကျေးရွာမှ ရပ်မိရပ်ဖများမှ ပြောပါသည်။

RCSS/SSA သည် အစိုးရနှင့် ပြည်ထောင်စုအဆင့် ငြိမ်းချမ်းရေး တည်ဆောက်ပြီးသည့်အဖွဲ့ ဖြစ်ပြီး တစ်ပြည်လုံးအပစ်ရပ်ရေး လက်မှတ်ရေးထိုးရန်အတွက် သဘောတူထားသည့် အဖွဲ့ဖြစ်ပါလျက် ရှမ်းပြည်နယ်တွင် ရှိသော တိုင်းရင်းသားများ၏ ပင်ပန်းဆင်းရဲစွာ ရှာဖွေစုဆောင်းထားသည့် ငွေကိုမှ ဆက်ကြေးငွေအဖြစ် ကောက်ခံနေခြင်းကို နားမလည်နိုင်ဖြစ်ရကြောင်း ကွန်ဟိန်းမြို့ခံတစ်ဦးမှ ပြောပါ သည်။

စိုင်းသီဟ

Credit >>> Shan News